Notiziis e avîs

Glesie furlane (www.glesiefurlane.org) e continue la schirie di ativitâts che le viodin impegnade te valorizazion des lidrîs culturâls, religjosis e linguistichis dal Friûl.

Une atenzion che no cjale dome a la storie vint come riferiment il patrimoni inestimabil dal Patriarcjât di Aquilee, ma ancje al dì di vuê cuntun voli a lis gnovis tecnologjiis.

Cun cheste atenzion propit par mantignî une azion leade ai timps de societât moderne, Glesie furlane e à realizât un program radiofonic cul titul “Lis flabis di Fedro voltadis pai furlans di pre Antoni Beline”, une schirie di leturis radiofonichis in 16 pontadis che a laran indevant ogni sabide fint a Nadâl 2009.

Il progjet al è realizât cence contribûts publics in colaborazion cun Radio FM Comunicar e il program “Fuarce Furlans” (che si pues scoltâ ancje in streaming su http://www.fuarcefurlans.com.ar/) fat de radio dai furlans di Colonia Caroya te provincie di Cordoba in Argjentine.

La trasmission e je stade ideade di Christian Romanini che le à realizade cun Venusia Dominici e Sonia Romanini pes vôs e cul jutori tecnic di Luca Peresson e Claudio Roya: il program al ven trasmetût sedi in direte in FM in Argjentine e in streaming sul sît http://www.fuarcefurlans.com.ar/ ogni sabide te suaze dal program “Fuarce furlans” che al tache aes 5 dopomisdì (ore furlane). La repliche e je ogni lunis a 1 dopomisdì su lis frecuencis di Radio Onde Furlane (FM 90.0 MhZ) e dut l’archivi des pontadis si cjate on line: http://www.fuarcefurlans.com.ar/ .

Ma la atenzion a lis gnovis tecnologjiis che a permetin di scoltâ la radio in dutis lis bandis dal mont no si ferme chi: Glesie furlane, dongje dal sît isituzionâl (www.glesiefurlane.org) e je rivade ancje su Facebook, il plui cognossût social network dal moment “I confins fisics no esistin plui: il Friûl al va pensât no dome come la nestre Patrie cul teritori che o cognossìn, ma propit parcè che ator pal mont a son tancj i fîs e i nevôts di furlans, che tai agns a àn scugnût partî, al devente inevitabil resonâ intune prospetive “glocâl”, ven a stâi “pensâ globâl fevelant locâl”. Il Friûl al è duncje chel lûc, reâl e virtuâl, li che si fevele par furlan: che al sedi chi in Patrie, o in Argjentine o in Canadà o in cualsisedi altre bande dal mont e di Internet” e dîs Glesie Furlane.